Emmi för Plattdüütsch

Emmi 2017- Laudatio für Regenbogen-Gruppe der Kindertagesstätte

St. Marien Bugenhagen

Wat hebbt se öövt, de lütten Regenbagenkinner ut de Kita St. Marien Bugenhagen in Rendsborg! Glieks as de Emmi-Utschrieven in de Welt weer, hebbt sik de Lütten un de Groten an de Arbeit maakt. De Lütten, dat sünd de 23 Kinner ut de Regenbagengrupp – un de Groten, dat sünd Fru Hollmer un Fru Schöffski vun den Kita St. Marien, tosamen mit Bernd Lange, de as Ehrenamtler dreemal de Week kümmt un mit de Lütten de plattdüütsche Spraak inöövt. En halve Johr lang güng dat um dat schöne Thema Geboortsdag. Fru Meier schull ganz wat Schönes to’n Geboortsdag kriegen – so en richtig feine Geschenk.

Wat köönt nu Kinner schenken? An’n besten doch sik sülven. Un so hebbt sik de Lütten as Blööm un Deerten verkleedt – ganz smuck antokieken. Sünnenkäver un Grashüpper hebbt ünnerwegens op den Weg hen na Fru Meier, vörbi an Bööm un Büsch, de Sünn, de schient – en bunten Kinnerblomenstruuß plückt – mit Krokussen, Tulpen un Oosterklocken, de Zibbeln sünd denn ok noch glieks dorbi ween. Kloor, dat bi soveel smucke un söte Blööm en ganzen Dutt Immen answarmen kaamt. Un wat een bi so en Thema allens öven kann! De Naams vun de Farven un dat Tellen bet 6 un noch wieder. Sogor en Regenworm dörv mitspelen. An’t Enn is de hele bunte Sellschop bi Frau Meier ankamen un singt en Leed för ehr: Fru Meier hett Geboortsdag. Dorför gifft dat denn Saft un Koken bi Fru Meier.

Sowiet de Geschicht – man dat is lang nich allens. Ut düsse Geschicht is denn en lütten Film dreiht worrn, extra för den Emmi-Pries. Fru Hollmer un Fru Schöffski hebbt de wunnerboren Kostüme neiht – un Herr Lange hett as so en Regisseur mit de Lütten dat Plattsnacken inöövt. Een Dag keem de Kameramann – un denn worr dat spannend.

Düsse feine lütte Film hett de Jury allerbest gefullen – un dorüm sünd sik all glieks eenig ween: de is den Kinnergoorn-Emmi weert. Ik bün seker, de warrt nu en schönen Platz kriegen in de Kita St. Marien Bugenhagen. Villicht warrt düsse Figur op en Oog dor op hebben, wat Platt nich vergeten warrt. Man ik bün seker, dat geiht munter wieder. Mit Spelen un Verkleden, mit Singen un Spaaß lehrt sik jeedeen Spraak op’t Allerbeste, wenn dat Sprakenfinster noch so wiet apen steiht as in’t Vörschool-Öller. De Vokabeln kaamt denn vun ganz alleen un warrt ok nich so gau wedder vergeten.

Un nu schall dat man wieder bunt blieven bi de Regenbagenkinner, de plattdüütsche Spraak bringt Farv in den Kinnergoorn rin. Un wat fein is dat, wenn de groten Lüüd so as Herr Lange dorför sorgt, dat de Kinner uns Regionalspraak Platt mit op den Weg kriegt, bet na de School hen, man dat is nu nich mehr mien Thema. Dat kümmt glieks an de Tour.

Ik graleer vun Harten!

Marianne Ehlers

Referentin für Niederdeutsch und Friesisch beim Schleswig-Holsteinischen Heimatbund