Die Regionalsprache Niederdeutsch steht unter dem Schutz der Europäischen Sprachencharta.
In Schleswig-Holstein ist die plattdeutsche Sprache noch sehr lebendig – und dennoch muss auf allen Ebenen viel getan werden, um die Sprache zu erhalten und zu fördern.
Der Schleswig-Holsteinische Heimatbund ist aktiv dabei!
Teihn Regeln för de plattdüütsche Spraak
1. Snacken
Wenn wi wöllt, dat uns plattdüütsche Spraak noch lang to uns Kultur un to uns Land dorto hören schall, denn mööt wi ehr in’n Alldag snacken – överall wo dat passt un geern ok mal an anner
Steden.
2. Wiedergeven
Dat hett de Spraak al mal meist den Kopp kost: wenn de Öllern ehr nich an de Kinner wiedergeven doot, denn warrt de Moderspraklers ümmer weniger. Vundaag köönt wi dat beter maken un de Spraak ganz
normal mit Kinner un Enkelkinner bruken.
3. Tolerant warrn un blieven
Vundaag gifft dat vele junge un ok öllere Lüüd, de Plattdüütsch in Kursen oder alleen öven un lehren wöllt. Dat schullen wi stütten un nich quarken, wenn se mal Fehlers maken doot. Plattdüütsch is
keen Modermelkspraak – jedereen kann ehr as en Frömdspraak mit op den Weg kriegen.
4. In Kinnergoorn un School
Dat Lehren vun mehr as een Spraak maakt lütte Kinner plietsch – un dorum köönt wi de Spraak goot in Kinnergoorn un School insetten. De Kinner kriegt dat so nevenbi mit – un ehr dat mit Engelsch
losgeiht, köönt se al stolt seggen: „Ik kann twee Spraken!“
5. Lesen
Platt is en Spraak, de de Lüüd geern hören doot. Dorum kümmt dat Vörlesen un Vördregen besünners goot an. Överall, wo dat passt, schullen wi de plattdüütsche Spraak klingen laten. Dat maakt de
Lüüd Freud un höllt de Spraak in de Gang.
6. Theaterspelen
Jedereen geiht geern in’t Theater – an’n leevsten denn, wenn op Platt speelt warrt. Dor schullen wi hengahn un dat stütten – noch beter: sülven spelen un ok mit Kinner un junge Lüüd öven.
7. Schrieven
Schreven Schrift, de blifft. Allens wat opschreven is, kann wiedergeven warrn un leest warrn. Liekers schullen wi uns dorbi an Regeln holen – de gifft dat, denn kann jedereen uns Texten lesen, un
nich blots wi sülven.
8. Platt wiesen
Wenn wi Platt snacken köönt, denn schullen wi dat ok na buten wiesen - mit Anstekers an de Jack oder mit Opklevers an’t Auto. Wi schullen uns um Stratenschiller un Infotafeln op Platt kümmern; un
mit en plattdüütsche Spieskoort in’t Lokal smeckt dat Eten nochmal so goot.
9. In Blatt un Funk
Wi wöllt de Spraak ok in uns Heimatblatt lesen – allens, wat dor in hoochdüütsche Spraak afdruckt is, geiht ok op Platt. Dorför schullen wi uns insetten – oder ok sülven schrieven. In Radio un
Fernsehn wöllt wi ok geern wat op Platt hören.
10. De Spraak leven
Wenn wi uns all düsse Punkten to egen maakt, denn leevt de plattdüütsche Spraak tominnst noch so lang, as wi op de Welt sünd. Dorum: man to, dat lohnt sik – un de nächste Generatschoon maakt denn
wieder, so as wi ehr dat wiest hebbt!